唔怕做罪人 佐真奴：我愿意再射12码

xcy232323

       

        意大利将於周六(18日)凌晨欧国盃外围赛主场对北马其顿，佐真奴阔别5个月之後，获得意军重召，呢位中场上届世界盃外围赛2次对瑞士，都射失12码，成为球队无缘决赛周嘅罪人。不过，佐真奴扬言，如果领队史巴列堤安排佢做「刽子手」，佢绝对唔会退缩。
        佐真奴对上1次入选意大利名单系今年6月欧国联，新帅史巴列堤领军4场比赛以来，呢位巴西裔球员一直被弃用。佐真奴今次可以重返国家队，好大程度上因为辛度东拿利违规赌波，被罚停赛，腾出空缺。
        适逢意大利余下2场欧国外都系关乎出线嘅生死战，佐真奴会唔会再主射12码，备受关注，佢话：「关於过去射失12码嘅问题，并唔会影响到我，依家急不及待想上阵比赛，如果球队获得12码，而又需要我主射，我绝对唔会退缩，虽然领队仲未有安排人选，但我已经准备好。」
        佐真奴今年1月由车路士转投阿仙奴，曾被投闲置散，但近期获得主帅阿迪达重用，佢透露希望将来重返意甲搵食，但现时只会专注为兵工厂争取佳绩。