域陀奥森汉放风：我有曼联同车路士波衫！

xcy232323

       


        拿玻里前锋域陀奥森汉系球坛抢手货，各大豪门对佢虎视眈眈，呢位尼日利亚射手日前接受前辈约翰米基尔访问，就放风希望去英超搵食，更直认自己有曼联同车路士嘅波衫！约翰米基尔抢先表示，要做「经理人」将域陀奥森汉下季带去车路士。
        24岁嘅域陀奥森汉表示：「我冇特别锺意边支英超球队，但我有曼联同车路士波衫，我好多朋友都系车路士球迷，亦有啲曼联球迷，英超一向系每个非洲球员最崇尚嘅联赛。」作为前车路士球员，约翰米基尔就充当说客：「我知你下季会加盟车路士！我要做呢单转会嘅经理人，确保转会成功，自从杜奥巴离队之後，车路士就系要你呢种球员！」
        域陀奥森汉喺访问中，自爆夏天几乎被沙特嘅天价酬劳吸引：「老实讲，今个夏天我冇打算转会，跟住沙特开出一个非常高嘅价钱，真系好难拒绝。我同拿玻里倾完後都决定留队，点知我一直拒绝，沙特方面就一直加码，真系好疯狂，佢哋永不放弃，个酬劳可以改变我人生，但我最後都系决定留低。」