跨世代天王斗法 16岁耶马、38岁C朗齐入波

xcy232323

       

        周五(17日)凌晨欧国外赛事，两位跨世代球星斗抢镜，16岁嘅耶马再次为西班牙取得入球，协助「狂牛兵团」作客3比1击败塞浦路斯；至於「长青树」C朗拿度就继续刷新入球纪录，38岁嘅佢攻入今届欧国外第10球，带领葡萄牙作客2比0轻取列支敦士登。
        A组已获出线资格嘅西班牙，今场再用16岁嘅耶马做正选，佢喺开波5分钟就交功课，右路扭过门将同後衞近门射入先开纪录，西班牙随後再有奥耶沙巴尔同祖斯奴入波，塞浦路斯75分钟破蛋，无阻西班牙赢3比1，由於苏格兰喺另一边和波失分，西班牙最後一轮赢格鲁吉亚就可以锁定首名。
        耶马喺9月份对格鲁吉亚首演即入波，已成为西班牙史上最年轻入球者，今仗攻入佢喺国家队3场第2球，西班牙领队富安迪赛後表示：「耶马有与众不同嘅能力，佢可以好自然咁做一啲其他人觉得冇可能嘅事，我哋对佢嘅表现非常开心。」
        至於J组赛事，葡萄牙作客2比0赢列支敦士登，欧国外9战全胜，38岁嘅C朗再次成为赢波英雄。葡萄牙上半场久攻不下闷和0比0，但换边後2分钟，C朗即接应迪亚高祖达妙传左脚射入，10分钟後祖奥简斯路再入1球锁定胜局。呢球系C朗喺今届欧国外第10球，追平卢卡古并列外围赛射手榜第1位。