医院爆棚 加维被逼推迟8日手术

xcy232323

       

        巴塞隆拿中场加维周一(20日)凌晨为西班牙出战欧国盃外围赛对格鲁吉亚，膝部韧带严重受伤，原本会立即接受手术，但由於西班牙医院手术室爆棚，导致呢位19岁新星被逼延迟8日做手术，令人担心佢嘅伤势可能恶化。
        据悉加维嘅膝部十字韧带撕裂，半月板亦严重受伤，巴塞隆拿方面曾经表示，会安排加维尽快接受手术，但根据西班牙传媒最新报道，由於当地医院手术室已经满额，加维需要等到11月28日先至可以接受手术，呢段日子佢只可以留喺家中休息，认真无奈。
        由於加维好大机会缺阵今季余下赛事，巴塞隆拿准备明年1月冬季转会市场重开後签入中场，现时头号目标系向热刺借用卢施素，呢位27岁阿根廷国脚现时喺热刺长坐冷板，加上佢喺贝迪斯打出名堂，应该乐於重返西甲。事实上，热刺过去2季曾将卢施素外借去另一支西甲球队维拉利尔，唔排除会接受巴塞借用要求。