车路士自爆输镬甘 普捷天奴：好好好好嬲！

xcy232323

       

        国际赛前表现有起色嘅车路士，周六(25日)英超又打回原形，作客纽卡素喺连环自爆下惨败1比4，队长列斯占士食红牌、中坚堤亚高施华又自杀式送礼，领队普捷天奴赛後表示非常愤怒，形容今仗系全季踢得最差嘅比赛。
        近2仗大胜热刺同打和曼城，原本以为车路士已重返正轨，但今仗面对残阵嘅纽卡素，13分钟就被阿历山大伊沙克突破越位攻陷，车路士10分钟後靠史达宁罚球妙射追平，但全队表现仍然低迷，结果下半场兵败如山倒。
        纽卡素中坚拿修斯喺60分钟无人看管下顶成2比1，1分钟後堤亚高施华控球甩脚，被祖连顿抢到单刀射入，73分钟车路士队长列斯占士技术犯规，2黄1红被逐离场，踢少个嘅车仔83分钟再被安东尼哥顿轰入，以1比4大败而回。
        普捷天奴赛後表示：「呢啲赛事令我好、好、好、好嬲！我哋需要展示个性同特质，冇可能踢啲咁嘅波出嚟。纽卡素唔系踢得好好，但赢得非常轻松，我哋并冇展示出争胜嘅决心，亦冇正确嘅能量，今场系今季踢得最差嘅一场比赛。」