谢德谦：车仔白礼顿残阵对决斗头痕

xcy232323

       

        今个星期日英超会上演「好难捉摸」嘅车路士，主场对住啱啱喺欧霸赢波嘅白礼顿。今场双方除咗要克服喺寒流作赛之外，两边领队都同样头痕，事关两队加埋，差唔多有二十人因为受伤或者停赛出唔到场，喺调动方面大受影响。
        车仔今场有古古列拿同上场两黄一红被逐嘅列斯占士齐齐坐波监，加上利维高维尔受伤，成条防线踢得嘅球员一只手数得晒，仲要希望上场表现麻麻嘅堤亚高施华及时回勇，先有机会顶得住白礼顿啱啱伤愈复出嘅三笘薰，呢位日本国脚上场欧霸一复出就交出助攻，今季表现持续勇猛。预计白礼顿今场会继续打高位压迫，猛轰车路士一班难得有正选嘅後备。
        上仗车路士领队普捷天奴喺赛後，炮轰一班比赛态度不足嘅球员，我以球员经验去感觉，车仔今场通常都会知耻近乎勇。小弟会入去史丹福桥球场同大家评述呢场波，睇下呢班後生又识唔识做，踢番场好波。