列斯占士又打柴！大腿伤患「3连击」手尾长

xcy232323

       


        车路士周一(11日)凌晨英超作客输畀爱华顿，更惨系队长列斯占士再一次受伤，呢位右闸喺英格兰领队修夫基观战下提早退下火线。据报列斯占士大腿筋出现问题，亦系佢连续第3次受同一伤患折磨，旧患不断复发恐怕手尾会好长。
        列斯占士自10月宣布复出，今仗系佢第5次正选上阵，结果只系踢26分钟就提早离场，领队普捷天奴赛後表示：「我觉得大腿筋有问题，佢再次受伤实在唔系好事，列斯占士对车路士非常重要。」列斯占士上月拒绝英格兰徵召，希望专注回复健康，估唔到最终都难逃伤病侵袭。
        24岁嘅列斯占士伤患不断，更令人担心嘅系佢今次大腿筋旧患复发，佢上季曾因大腿伤患缺阵7场，今季季初又因同一问题休战9场，依家呢个伤患「连中三元」，预计今年内都未必能够复出，车路士短期内可能要用古古列拿客串右闸。