水晶宫防线「流血不止」 想借查洛巴救亡

xcy232323

       


        水晶宫防线穿窿，近6场英超有5场失波达到2球或以上，前面入埋唔够後面输，若然再冇改善，随时卷入降班旋涡。根据英国传媒报道，水晶宫领队鹤臣打算下月转会市场重开後，借用车路士後衞杜利奥查洛巴堵塞漏洞。
        杜利奥查洛巴因为伤患问题，今季仍然未曾上阵，预料下月可以复出，但由於呢位24岁英格兰中坚抖得太耐，加上队内仲有3位名牌中坚堤亚高施华、班洛特巴迪亚舒尼、阿素迪沙斯，就算杜利奥查洛伤愈，都难有上阵机会，据悉佢希望外借去其他球队，以便重拾比赛状态。
        车仔主帅普捷天奴亦有意精简阵容，唔介意放走呢位「冗员」，立即吸引水晶宫注意，希望借用杜利奥查洛巴以解燃眉之急。
        拜仁慕尼黑教练杜曹亦想借用杜利奥查洛巴，但如果佢转投呢支德甲劲旅，恐怕上阵时间唔会多，水晶宫实力及财力都唔及拜仁，反而更有利吸引急於获得比赛机会嘅杜利奥查洛巴加盟。