曼联总监飞沙特 兜售2.3亿镑「4大瘀血」

xcy232323

       

        曼联今季成绩令人失望，1月转会窗势必继续翻新换血，据英国《每日邮报》报道，曼联足球总监梅托早前秘密飞沙特阿拉伯，同沙特联赛会商讨4名球星转会，包括查顿辛祖、安东尼马迪尔、卡斯米路同华拉尼，不过梅托此行只系初步接触，离开沙特嗰阵未有达成任何协议。
        据报梅托月初飞去利雅得同沙特联赛代表会面，希望可以兜售辛祖、安东尼马迪尔、卡斯米路同华拉尼4球星，曼联当初签呢4位球星花费总值2.3亿镑(约22.68亿港元)，但为筹集资金喺1月畀领队坦哈格买人，目标包括中坚、中场同前锋各一，会愿意大幅割价求售。
        不过，《每日邮报》指沙特球会未必会喺1月重槌出击，而系留待夏天先再次扫货，消息指曼联依家最大目标系踢走英格兰翼锋查顿辛祖，其余3人如果冇收到合适报价，亦唔会强逼佢哋离队，梅托返英国前未冇就任何转会达成协议。
        1月嘅转会市场好可能系梅托「揸旗」嘅最後一个转会窗，盛传新股东拉特克利夫完成入股後，梅托将会被革去总监一职，拉特克利夫属意新嘅管治班底，候选总监包括法国嘅前曼联球员白兰斯以及前水晶宫总监费曼。