热刺伤停问题多 爱华顿发穷恶受让笋

xcy232323

       

        英超焦点战，热刺主场硬撼「拖肥糖」爱华顿。热刺虽然连赢两场，但伤停问题未见改善，爱华顿近期为护级发穷恶，疯狂抢分好似抢钱咁抢，呢粒「拖肥糖」绝对唔易啃，让球客胜咪错过。（Now 621周六晚11时直播）
        北伦敦劲旅热刺，经历早前5场不胜嘅低潮後，接连击败纽卡素同诺定咸森林，总算成功止血，前锋李察利臣连续2场有波入，信心返晒嚟。不过热刺嘅伤兵同停赛问题依然严峻，比列锡、占士麦迪臣、云迪尹固然未好番，左闸乌杜治仍要停多1场，防中比苏马上场赢森林无喇喇又做「红牌阿姑」，今季已经第3度因领红牌或累积黄牌够数要坐波监，仲要停3场，对防守都咪话冇影响。
        另边厢，爱华顿愈战愈勇，近8场联赛取得6胜1和仅1败，包括击败车路士、韦斯咸、水晶宫等伦敦球队，单计作客更加豪取4连胜，唔讲得笑，由於「拖肥糖」联赛被扣10分，反而更加激起佢哋要靠自己自救嘅斗志，果然知耻近乎勇疯狂抢分，就算卡维特利云脚风唔顺，仲有中场杜哥利、杜韦麦尼尔等屡建奇功，加上依家士气大振，热刺要赢唔易，宁捧受让嘅当头起「拖肥糖」让球客胜。