柏比沙亚受伤喊住走 或无缘非国盃

xcy232323

       

        热刺周日(31日)英超3比1赢般尼茅夫，先开纪录嘅柏比沙亚喺上半场大腿受伤，伤心到喊住咁离开球场，据报呢位塞内加尔国脚将接受检查，未必赶得切出战非国盃决赛周。
        21岁嘅柏比沙亚今季上位，今场入波系佢今季英超第2球，可惜32分钟就因大腿受伤退下火线，佢被换出嗰阵亦忍唔住喊，要孙兴民等队友上前安慰，似乎伤势唔轻。
        热刺领队普斯迪高路赛後透露：「沙亚情绪好激动，因为佢好想返国家队，非国盃对佢嚟讲系好重要嘅比赛。沙亚今仗表现好好，我希望佢伤势唔系太严重，仍然可以出战非国盃。」
        塞内加尔上届非国盃夺冠，柏比沙亚亦系冠军成员之一，不过当时只得19岁嘅佢上阵机会唔多，依家作为塞内加尔主力，佢亦希望可以带领国家队成功衞冕。