热刺赢波普帅照开拖：我祝佢新年快乐之嘛！

xcy232323

       

        周日(31日)英超联赛，热刺主场3比1击败般尼茅夫，逼近联赛前4位置，依家只落後第4位嘅阿仙奴1分。热刺今场赢得轻松，不过补时阶段出现火爆场面，热刺领队普斯迪高路同客队职员冲突，呢位澳洲教头赛後想大事化小：我祝佢新年快乐之嘛！
        热刺开波9分钟就有柏比沙亚入波，即将离队出战亚洲盃嘅孙兴民，71分钟接应卢施素直线射成2比0，9分钟後李察利臣再改写成3比0。大局已定下，般尼茅夫喺84分钟破蛋，估唔到补时仍发生冲突，当时热刺前锋维利斯受伤，普斯迪高路冲出场边大叫佢瞓喺地，般尼茅夫教练同职员不满佢下令「拖时间」，双方互相推撞，混乱中普斯迪高路同卢施素都食黄牌，但最重要系热刺保住胜局全取3分。
        普斯迪高路赛後冷静落嚟，对冲突作出解释：「我冇事呀，我哋祝对方新年快乐之嘛！呢场比赛系有啲激情，我当时只系关注维利斯嘅伤势，佢唔想出场。」至於般尼茅夫领队伊拉奥拿，亦明白普斯迪高路做法：「追番1比3後我哋向热刺施加好大压力，领先嗰队梗系想拖得就拖，好正常，我会明白同接受。」