球场、医院两边走 暖男麦尼尔守护重病女友

xcy232323

       

        英超球员嘅桃色新闻就听得多，但原来都有深情「暖男」，爱华顿翼锋杜韦麦尼尔喺圣诞新年快车场场踢足，估唔到比赛以外，佢一直医院、球场两边走。杜韦麦尼尔女友Megan Sharpley最近发表感人公开信，多谢杜韦麦尼尔不离不弃嘅照顾，令人为之感动。
        杜韦麦尼尔喺12月份8场波场场正选，其中7场踢足全场，但喺呢个佳节期间，佢女朋友Megan就做咗一个紧急手术，甚至有器官被切除，手术後亦要继续住院。Megan最近喺社交网感动表示：「杜韦，每次收到噩耗，你都会捉住我双手，你提醒我自己有几坚强，话畀我知一切都会冇事。你帮我着衫、帮我清洁、喂我食饭、帮我打针，全心全意咁照顾我，而且永远唔会投诉，你瞓喺我病床隔离，就算我觉得世界末日，你都喺度逗我开心，你系世界上最神奇嘅人！」
        24岁嘅杜韦麦尼尔亦转载女友嘅贴文，留言回应：「我哋系一队人，我爱您！」呢位英格兰翼锋2022年由般尼加盟爱华顿，上季为球队交出7个入波同3次助攻，今季已有2个入波同4次助攻，成为爱华顿不可或缺主力。