高图尔斯复操 望季尾复出

xcy232323

       

        皇马收到好消息，养伤近半年嘅门将泰拔高图尔斯近日已恢复单独训练，预料5月可以重返球场比赛，呢位比利时国脚重申唔会参加今届欧国盃，并暗示国家队已经唔需要佢，唔排除结束国际赛生涯。
        泰拔高图尔斯上年8月因为左膝十字韧带受伤，需要接受手术，至今一直缺阵，根据西班牙电视六台报道，呢位现年31岁钢门已可以进行单独训练，距离复出行近一大步，但估计都要等到5月先至可以参加比赛。皇马现时2位副选门将阿列沙巴拿加、卢连表现不俗，相信教练安察洛堤唔会急於要求高图尔斯复出。
        泰拔高图尔斯早前透露为咗以最佳状态迎接下季赛事，唔会为比利时出战6月中展开嘅欧国盃，佢近日接受访问时，表示唔会改变决定：「即使我季尾复出，都100%唔会踢欧国盃，2018年世界盃系我哋夺取大赛冠军最佳机会，近斯已经冇人同我倾返国家队嘅问题，或者佢哋唔再对我有期望，虽然我想继续为国家队效力，但我已经唔年轻。」泰拔高图尔斯言下之意，似乎想淡出国际赛舞台。