【人物志】落难「新美斯」颠沛流离

xcy232323

       

        阿根廷球王美斯已经36岁，球员生涯接近尾声，历年来出现唔少「新美斯」，但往往昙花一现，包括外形同美斯非常相似嘅卢卡罗美路。呢位阿根廷新星15岁就踢西甲，曾经创出多项纪录，美斯都望尘莫及，但无以为继，近年沦为「人球」，今个月又面临被AC米兰放弃。
        现年19岁嘅卢卡罗美路身高1米65，身形、踢法都同美斯相似，亦曾经去过巴塞隆拿青年军试脚，但未获留用。不过，并冇掩盖卢卡罗美路锋芒，佢为马略卡青年军上阵108次入230球，第1次西甲上阵，只系15岁零219日，成为欧洲五大联赛史上最年轻上阵球员。
        卢卡罗美路2021年夏天转投拉素，以16岁零9个月10日成为球队史上最年轻披甲球员，2022年11月卢卡罗美路射入全场唯一入球，协助拉素以1比0击败蒙沙，更成为首位喺意甲入波嘅「04後」球员。
        不过，拉素并冇留用呢位「天才」，反而上年夏天畀佢自由身转会，加盟AC米兰，佢喺季前热身赛对皇马，後备上阵射入世界波，尽显未来球王功架。当全世界以为卢卡罗美路会成为美斯真正接班人时，A米教练皮奥利并冇重用佢，各项赛事仅上阵5次，合共只踢咗155分钟。
        AC米兰打算今个月将卢卡罗美路外借，莱切、沙兰力坦拿有意借佢用，但呢位新星倾向重返西甲。