高尔彭马又入波！车仔险胜富咸

xcy232323

       


        周六（13日）晚英超头场上演伦敦打吡，车路士凭高尔彭马射入12码，喺主场以1比0击败富咸，为嚟紧周中英联盃4强次回合斗米杜士堡壮行色。
        由於车仔「败家仔」尼高拉斯积逊要出战非国盃，今场改由布查打箭头，高尔彭马同史达宁於两边支援，富咸则有老将韦利安倒戈。车仔上周中英联盃首回合输畀米杜士堡，又心系嚟紧周中嘅次回合，今场明显心不在焉，上半场未见好入肉嘅埋门，直到完半场前史达宁於禁区被伊沙迪奥普扫跌，球证直指12码，近期频频入波嘅高尔彭马操刀破网，取得今季联赛第9个入波，成为车仔史上单季联赛入波最多嘅U21球员，其中5球系来自12码，车仔领先1粒返入更衣室。
        车仔先咗纪录後成队醒晒，下半场揿住富咸嚟攻，高尔彭马频频於边路发难，史达宁更头槌顶中柱，之後富咸中场安达斯彭利拿横传，可惜空晒嘅鲁尔占美尼斯射波软弱无力，最终车仔小胜1球。