非国盃热门齐甩拖 沙拿救命波帮埃及执1分

xcy232323

       


        非国盃开锣後冷门不断，继尼日利亚只能逼和赤道畿内亚後，周一(15日)凌晨2场B组赛事亦令人大跌眼镜。上届亚军埃及要靠穆罕默德沙拿97分钟嘅12码，2比2逼和莫桑比克，而加纳更以1比2输畀佛得角。
        埃及首战对世界排名111嘅莫桑比克，开波2分钟就由穆罕默德沙拿助攻穆斯塔法穆罕默德入波，以为可以食菜咁食，点知莫桑比克喺55分钟同58分钟闪电连入2球反超前，当莫桑比克以为拎到史上首场非国盃胜仗，穆罕默德沙拿就喺97分钟射入救命12码，最终2比2打成平手。同组另一热门加纳，更被佛得角喺补时绝杀输1比2，次轮埃及同加纳正面交锋，直接影响出线前途。
        埃及嘅表现令人失望，不过利物浦领队高普就肯定掩住半边嘴笑，佢喺穆罕默德沙拿返埃及前表示：「我同沙拿讲过，如果我话祝你好运，肯定系个大话。个人嚟讲我会好开心见到埃及分组赛出局，不过呢件事好可能唔会发生，埃及有能力赢得冠军。」