为高普而战！利物浦抢半W

xcy232323

       

        英超「双红」之一利物浦，周日(28日)晚英足盃第4圈主场迎战「金丝雀」诺域治。利物浦主帅高普日前宣布季尾离任，众将为咗用奖盃欢送恩师实搏甩髀，依家红军势头唔系人咁品，遇上实力平庸嘅「金丝雀」，一定先发制人，半场主胜有计。(无綫myTV SUPER周日晚10时30分直播)
        利物浦呢几年喺高普带领下赢尽英超、欧联等锦标，佢绝对系球队复兴嘅灵魂人物，如今呢位德国教头明言能量耗尽，今季完结後需要抖抖，因此决定离队，虽然不舍但可以理解。由於余下场数都系告别战，众将都希望恩师夺冠光荣离开，呢份额外动力唔讲得笑。
        查实红军近期本身状态唔错，各项赛事近6场录得5胜1和，唔单止联赛排紧榜首，上圈英足盃击败阿仙奴外，上周中英联盃亦淘汰富咸杀入决赛，连埋欧霸盃4线作战，纵然穆罕默德沙拿受伤，好彩「败家仔」达云纽尼斯近期总算生性，常有入波或助攻，伤愈复出嘅迪亚高祖达更系及时雨，加上路易斯迪亚斯同加普，红军锋力未见受削。
        另边厢，英冠球队诺域治除咗实力远逊红军外，佢哋依家争升班大过天，距离前6嘅升班附加赛区唔远，无暇兼顾盃赛，睇番佢哋上圈要打到重赛先淘汰布里斯托流浪，如今撞正红军，够晒理由提早毕业。翻查纪录，两军近4次交手，利物浦有3次半场领先，半场主胜不妨再追。