曼城逼和车路士 夏兰特狂失机发脾气

xcy232323

       

        曼城衞冕英超受到打击，周日(18日)凌晨主场只能1比1逼和车路士，落後踢多场嘅榜首利物浦4分。艾宁夏兰特今场疯狂失机成为曼城罪人，个人9次射门都冇波入，包括门前6码空晒头槌顶高，赛後佢心情极差，更怒推电视台镜台泄忿。
        曼城今仗强阵出击，车路士嘅反击亦相当到肉，双方互有攻守，42分钟车仔快速反击，尼高拉斯积逊右路发难，传畀史达宁巧妙推大位抽入1比0。曼城失守後极力反扑，但夏兰特头顶脚踢连番失机，78分钟接应奇云迪布尼传中，6码点无人看管下竟然顶高。直到83分钟，曼城终凭洛迪卡斯简迪建功追平，两队1比1握手言和。
        夏兰特今场罕见做「败家仔」，全场9次射门合共录得1.71预期入球(xG)，惨成今季最高xG而冇波入球员，亦系自2017年嘅阿古路之後，曼城首个单场9次射门「食白果」球员。向来自我要求极高嘅夏兰特，赛後明显心情低落，一度将《天空体育》嘅摄影机大力推开，被批评欠缺风度。
        曼城领队哥迪奥拿亦力撑夏兰特：「佢有9次射门系好现象，下次就会入波。我都做过11年球员，平均每季入1球，所以我唔系畀前锋意见嘅合适人选，我唔会怪夏兰特，足球就系咁样，夏兰特都只系一个凡人。」