夏兰特实现入球大满贯 曼城赢波力逼利物浦

xcy232323

       


        周三(21日)凌晨英超补赛，曼城作客1比0击败宾福特，压倒阿仙奴升上联赛榜次席，仅落後「1哥」利物浦1分，榜首3雄只有2分差距竞争激烈。挪威神锋艾宁夏兰特今场一箭定江山，而且更实现英超「入球大满贯」，短短1年半内攻破所有对手(21队)大门，认真恐怖！
        曼城今仗控制战局，攻势浪接浪，全场多达24次攻门，有11次命中目标，但宾福特门将菲利根「上身」屡救险球，又有後防白界线前救空门，令曼城迟迟都入唔到波。直到71分钟曼城一次长传，基斯杜化艾查「谢拉特式跣脚」，畀夏兰特长驱直进单刀射入，为曼城一槌定音。
        夏兰特上场对车路士9次攻门「食白果」，一度受到质疑，不过今场再做英雄，而且佢攻破埋宾福特後，登陆英超1年半以来，喺英超面对过嘅21支球队全部都畀佢入过波，完成「入球大满贯」，亦系英超史上第2人。「大满贯」第1人系哈利卡尼，佢喺英超对过32队都有入过波。
        曼城领队哥迪奥拿赛後亦代夏兰特反击批评：「我唔系记者，但有老友同我讲，永远唔好批评顶级射手，因为佢会用入球令你收声。夏兰特之前养伤2个月，而且经历祖母去世，对任何人都唔易承受，如果我可以拣入球机会落喺任何一个球员身上，我一定会拣夏兰特。」