曼联被绝杀前4势危 坦哈格死撑：前景光明

xcy232323

       


        近期状态复苏嘅曼联，周日(25日)凌晨英超遇上重大挫折，佢哋主场喺97分钟被富咸绝杀惨输1比2。「红魔鬼」输到今季第10场联赛，输波场数已经追平上季全季数字，而且落後第4位嘅阿士东维拉8分，争夺前4资格势危，不过领队坦哈格赛後仍然嘴硬，死撑话曼联前景一片光明！
        赛前5连胜嘅曼联，今场用拉舒福特代替受伤嘅海伦做箭头，但富咸表现反客为主，上半场两队各有1次射门中柱。踢到65分钟，富咸中坚奇云巴锡藉角球攻势抽入，曼联喺完场前1分钟由哈利马古尼「执鸡」追平，点知去到补时7分钟，富咸快速反击由伊禾比射入，2比1绝杀曼联。
        曼联经历2024年首场败仗，今季26场联赛输咗10场，唔单止追平上季输波场次，亦系自费格逊退休後，曼联第5季单季英超输波达到双位数，依家落後第4位嘅阿士东维拉8分，比第5位嘅热刺亦少3分兼踢多1场，要争取来季欧联入场券形势危急。
        坦哈格赛後继续保持阿Q精神：「1场输波唔使咁大反应，我哋要将个画面拉番阔啲，拉阔睇曼联前景一片光明。部份位置需要改进，伤兵返嚟球队就会更平衡，之後再喺转会窗增兵，我哋有好多极高质新人上紧，未来只会愈嚟愈好，曼联完全行紧正确方向，夫添嘅话我哋系支好好嘅球队。」