利物浦3比1反胜AC米兰 将圣西路当游乐场

xcy232323

周三(18日)凌晨欧联大战，英超劲旅利物浦作客3比1反胜AC米兰，顺利打响头炮。「红军」今场占尽优势，延续历来喺圣西路球场嘅100%胜率，为首次出战欧联嘅领队施洛，送上46岁生日嘅最佳礼物。
利物浦喺英超意外输畀森林後，今场开波3分钟就犯错，被基斯甸普列锡先拔头筹。利物浦企稳阵脚後迅速控制局面，穆罕默德沙拿左右脚施射两度中楣，已为AC米兰防线响起警号，最终伊巴希马干拿迪23分钟接应罚球顶入追平，41分钟再由另一中坚华基尔云迪积克接应角球顶入，加上苏保斯拉尔67分钟近门射入，「红军」全场攻门12对2嘅压倒性优势下，顺利反胜3比1完场。
AC米兰同国际米兰都系欧联名牌，佢哋嘅圣西路球场亦享负盛名，不过利物浦就将佢哋地头变成游乐场，历来欧联4次作客圣西路(对AC、国米各2次)全部赢晒，系欧洲唯一作客圣西路(多过1次)保持100%胜率球队。
首度领军踢欧联嘅施洛，今场咁啱系46岁生日，佢赛後表示：「一个好好嘅生日节目，上场联赛输0比1系个打击，今场又早早失波，我好奇球员会有咩反应。我哋有多过11个球员，所有入替嘅球员都有好表现，今场系整体嘅胜利多於个别球员嘅表现。」