朗奴高文嬲贝云积去沙特：佢嘅荷兰生涯已完

xcy232323

荷兰球星贝云积日前宣布离开阿积士，以2,100万欧元转会费加盟沙特劲旅伊蒂哈德，不过呢单转会就令荷兰主帅朗奴高文火滚，佢周三(4日)公开批评贝云积「为钱弃前途」，表明该26岁翼锋嘅国家队生涯已经完结。
朗奴高文喺荷兰记者会表示：「贝云积嘅国家队生涯基本上已经完结，我觉得当你只得26岁，你嘅目标应该系竞技层面而唔系经济层面，佢留喺阿积士待遇都唔会差。每个人有自己选择，我就一定唔会行佢呢条路，佢事前冇问过我意见，我谂佢都知我会讲乜。」
不过，荷兰另一国脚韦拿杜姆之前加盟沙特球会伊蒂法克，仍然有份入选荷兰夏天欧国盃大军，朗奴高文就否认「双重标准」：「韦拿杜姆喺巴黎圣日耳门遇上问题，去沙特系唯一比赛机会，而且年纪都唔同，唔可以同贝云积做比较。」