哈利卡尼成淘汰赛之王 一个现象竟变C朗？

xcy232323

英格兰近年一直靠王牌前锋哈利卡尼数胡，呢位拜仁慕尼黑前锋喺4强对荷兰凭12码入波，成为欧国盃史上淘汰赛最多入波球员。不过，即将31岁嘅哈利卡尼喺队中作用逐渐式微，连续3场淘汰赛都被换走，有球迷更指佢成为「英格兰C朗」，成为球队负累嘅大牌必然正选。
哈利卡尼今届6场比赛全部正选，今场嘅12码系佢历来第6个欧国盃淘汰赛入波，超越法国嘅基沙文(5球)成为欧国盃历来淘汰赛士哥王。虽然入波破纪录，但哈利卡尼今届表现持续低迷，对上2场淘汰赛加埋只系掂波55次，今场虽然经常返中场拎波，但禁区内仍然冇啖好食，《每日邮报》评佢为英格兰正选中第2低分球员。
事实上哈利卡尼喺队中重要性明显下降，英格兰3场淘汰赛入面，都喺打和或落後情况下将佢换走，而球队喺佢离场後又确实踢得更好，不过哈利卡尼就唔介意自己重要性下跌：「神奇嘅成就！我为每个球员同职员光荣。我哋一直讲要做好准备，英格兰系庞大球队，每个人都准备好，就算只系5分钟或者1分钟，都有机会帮英格兰捧盃。」