巴塞隆拿西盃出局 法迪又受伤喊住离场

xcy232323

       

        周五(21日)凌晨西班牙盃16强大战，巴塞隆拿作客毕尔包激战至加时以2比3落败，更惨嘅系伤愈复出嘅新星安素法迪，後备上阵踢半个钟头又再受伤，喊住咁离场令球迷担心，初步检查指佢嘅二头肌出现问题，要抖几耐仲要更详细检查。
        毕尔包开波2分钟就由蒙尼恩妙射领先，1月加盟嘅费伦托利斯20分钟为巴塞隆拿追平，踢到完场前4分钟，毕尔包再由恩尼高马天尼斯近门撞入，以为呢个会系「绝杀」，但巴塞隆拿补时3分钟靠柏迪入波追成2比2，令比赛进入加时。
        踢到第105分钟，巴塞隆拿後卫佐迪艾巴禁区内犯手球被罚12码，毕尔包由蒙尼恩操刀射入致胜球。巴塞隆拿教练沙维赛後表示：「我哋一直好唔顺，基本上从来冇顺利过，想要嘅成绩未出现，但我哋要继续相信自己，出局嘅结果系好难消化，但球队仲要喺西甲同欧霸盃努力。」