麦巴比连续2季联赛入波25+ 创法甲50年纪录

xcy232323

       


        周日(15日)凌晨法甲，已经提早夺冠嘅巴黎圣日耳门(PSG)并冇留力，作客以4比0大胜蒙彼利埃，基利安麦巴比今仗射入1球，并贡献2次助攻，造就美斯梅开二度。麦巴比今季联赛已经有25球进帐，成为法甲近50年以来，首位连续2季入波「25+」球员，势将以最强姿态加盟皇马。
        基利安麦巴比今仗演出光芒四射，开赛20分钟内已经2次妙传畀美斯入波，帮呢位阿根廷球王今季首次喺法甲梅开二度，其後迪马利亚建功，PSG上半场已经领先3球。
        换边之後，基利安麦巴比博到12码，自己操刀射入，今季联赛累积入25球，呢位23岁法国国脚继上季联赛入27球之後，今季入波再达25球或以上，法甲近50年以来，只有佢做到呢个壮举。
        同埋麦巴比今季法甲仲有19次助攻，喺助攻榜及射手榜都排第1位，证明以佢嘅实力踢法甲，实在大超班，预料呢位「新世代球王」将於今夏转投皇马，接受新挑战，据悉「银河舰队」已经预制2万件麦巴比嘅皇马波衫，准备迎接佢加盟。