直播两场关键大战 德乙煞科同你见证

xcy232323

       


        堪称近年竞争最激烈嘅德乙联赛，斗到煞科日仲未知道冠军以及升班资格谁属，各名牌为「冲甲」一定搏甩髀！《on.cc东网》周日(15日)晚9时30分同步直播两场关键大战，分别为纽伦堡主场对史浩克04，以及罗斯托克火并汉堡。当中「04香港首席Fans」刘舜文就同大家见证史浩克04能否封王；「波盘专家」J臣及乐比坚尼则坐镇《创富FORM》，全程睇实汉堡、云达不来梅同达斯泰特边队「笑到最後」，仲会即场提供「贴士」帮大家搵大钱！
        史浩克恨锦标誓拆纽
        史浩克04经历上个失败球季降落德乙後，今季大踢争气波，现时以62分高踞榜首，除锁定前两位升班资格外，今晚只要拎多1分即好大机会封王。「04超级Fans」刘舜文就相当期待：「自从暂代教练布斯坚斯上任後，成功凝聚到班球员，虽然防线仲有唔少甩漏，但『德乙球王』泰路迪把握力极强，加上笃定季尾买断嘅借将沙拿沙愈战愈勇，总算做到以攻代守。」
        刘舜文睇好爱队原来仲有另一个原因：「史浩克今晚煞科战作客友好球会纽伦堡，虽然和波都极大机会夺标，但我深信佢哋唔会hea踢求和算数，始终上次捧盃已经系2011年德国盃同德国超级盃，球队对锦标充满饥渴感，今晚赢波夺标绝对系全队上下最大目标！」
        两大专家睇好汉堡
        周日(15日)晚另一焦点，一定系老牌球会汉堡能否保住升班附加赛资格，喺《on.cc东网》担任多年德乙评述嘅Ｊ臣就非常睇好：「赛前排第2嘅云达不来梅只要攞多一分，来季即可重返德甲，相信唔会甩拖。今晚焦点自然落喺第3位附加赛资格度，今季唔玩『放头』改『後追』嘅汉堡愈战愈勇，上轮赢波後以大幅得失球差压过达斯泰特，进占联赛榜第3位，今晚对手只系位处下游兼踢风流波嘅罗斯托克，汉堡要赢冇咩难度，起码有得踢附加赛先。」
        另一位「波盘专家」乐比坚尼一样睇好汉堡：「汉堡降落德乙已经第4季，之前3季都不幸做『梗颈四』，难得今季展现後劲，依家总算命运掌握喺自己手中，加上有巨大得失球差优势，赢波至少拎到升班附加赛席位。究竟今季德乙会唔会Happy Ending，『Big 3』史浩克04、云达不来梅同汉堡齐齐如愿以偿，就要留意东网直播喇。」
        各位球迷如果想喺直播期间，同3位评述互动沟通讲波经，记得到时喺《睇体ontv Sports》或者《东网体育》嘅facebook留言喇！
        东网直播
        5月15日 9:30pm
        纽伦堡 对 史浩克04
        评述：刘舜文
        罗斯托克 对 汉堡
        评述：J臣、乐比