莫高高拖延续约多蒙特 因为唔想益父母？

xcy232323

       

        多蒙特嘅17岁前锋尤素法莫高高今季成功上位，近5场联赛3度取得入球，不过呢位小将同球会合约明年夏天完结，续约谈判又迟迟未有结果，据报利物浦、皇家马德里、巴黎圣日耳门等豪门都密切注视，而莫高高拖延续约原因，竟然系唔想益佢父母！
        据德国《图片报》报道，尤素法莫高高同父母以及几位家人反面，甚至威胁唔会对家人作出财政援助。由於莫高高依家未够18岁，如果续约嘅话，所有财政收入都会由父母管理，但佢喺11月20日就18岁生日，可以自己管理财富，无论佢续约定系签约其他球会，所有收入都可以「自己袋」。
        消息指多蒙特同莫高高仍就续约拉锯，球会开出400万欧元年薪，但佢就要求拎800万欧元，同多蒙特最高薪嘅安利简恩、晓姆斯睇齐，而且莫高高有唔少球会吼住，绝对可以吊高嚟卖。