巴西总统大选又关尼马事？面临被追税

xcy232323

       

        巴西总统大选刚於周日(30日)举行，巴西王牌前锋尼马牵涉其中，原因系尼马所支持嘅博尔索纳罗连任失败，尼马嘅逃税嫌疑，面临被新任总统卢拉清算。
        尼马之前公开支持博尔索纳罗连任，仲话要将卡塔尔世界盃射入嘅第1球献畀佢；此事喺巴西政坛惹来唔少批评，巴西国家队警告球员避免参与政治及损害士气嘅行为，当时候选人卢拉更反击，直指尼马同博尔索纳罗勾结，有唔少丑闻。
        卢拉所指嘅丑闻，系尼马喺2019年被控性侵，全靠博尔索纳罗帮佢摆平，到总统大选期间，尼马公开支持博尔索纳罗，系因为双方达成协议，免除尼马巨额税款。
        依家博尔索纳罗输咗，卢拉胜选，尼马自然一身蚁，尼马喺IG发帖上载图片，相中尼马手执巴西国旗，并留言：「上帝、国家、家庭和自由，感谢你为我哋做出决定。」不过卢拉支持者唔会放过佢，互联网上有影片流传，有卢拉支持者大叫：「尼马，你要交税！」
        尼马想甩身，依家只得一个方法，就系帮巴西赢得世界盃。