两年前曾爆冲突 戴治：我唔会同情高普

xcy232323

       

        周二(14日)凌晨将上演英超「默西赛德郡」利物浦主场对爱华顿，由於「拖肥糖」新帅戴治曾於2年前同红军领队高普发生冲突，令今场大战增添火药味。戴治对於利物浦今季成绩差，表示唔会同情高普，但感同身受，认为系所有教练都会遇上嘅问题。
        2021年1月英超，当时仲系般尼领队嘅戴治带队作客利物浦，半场休战时，佢行入球员通道期间同高普发生激烈口角。戴治嚟紧又要造访晏菲路球场，佢讲番呢件事：「其实只系两位领队各为其主交手，并冇其他意思，球迷希望双方主帅为所属球队采取应有行动，我认为比赛结束後，事情就完结。」
        该仗般尼爆冷赢1比0，戴治为免激刺今场球迷情绪，并冇透露当时两人争拗原因，只系讲笑话高普指佢件外套唔好睇，所以自己作出反驳。
        当提到利物浦今季成绩欠佳，令高普备受压力嘅时候，戴治话：「我唔会同情高普，只有感同身受，佢亦唔需要我同情，我嘅注意力都放喺爱华顿身上。」戴治上仗首次带领爱华顿出击，立即以1比0击败榜首阿仙奴，结束4连败，呢位51岁名帅的确有料到。