皇马炒基罗纳 比宁咸1+1反击「低分」评价

xcy232323

       


        周日(1日)凌晨西甲榜首大战，皇家马德里作客3比0大破基罗纳，英格兰中场祖迪比宁咸继续有统治性演出，今场交出1射1传成为赢波功臣。祖迪比宁咸日前批评最新足球游戏《EA FC 24》入面对佢传送能力嘅评分，今场嘅精彩助攻就为佢争番啖气。
        开季成绩突出嘅基罗纳，今场面对皇马明显招架唔住，17分钟祖迪比宁咸左路用脚背「片」出精彩助攻，个波送到龙门口畀祖斯奴轻松射入，4分钟後曹亚文尼头槌顶成2比0，祖迪比宁咸喺71分钟亦有入波，带领皇马大胜3比0，8战得21分升上榜首位置，祖迪比宁咸亦以6个入波喺射手榜领先。
        喺最新《EA FC 24》入面，祖迪比宁咸嘅传球能力只有79分，佢对呢个分数就表示不满：「我想知你想睇到我交咩传送，先可以畀我加入80分行列？」祖迪比宁咸今场嘅脚背助攻，就被网民大赞有莫迪历影子。祖迪比宁咸赛後表示：「呢3个月我日日睇莫迪历踢波，我只系想发挥创造力，基罗纳早段畀好大压力我哋，呢个入波打消佢哋嘅气势。」