迪基亚现身曼市 网民：奥拿拿颤抖吧

xcy232323

       

        迪基亚今夏约满离开曼联後，返回家乡西班牙马德里，一直未有班落，呢位32岁西班牙钢门近日喺社交网「打卡」，话自己身处曼彻斯特，惹起重投曼联疑云，网民纷纷「抽水」指今季成「魔」後频频犯错嘅门将奥拿拿，现时应该非常担心地位不保。
        迪基亚上载1张喺网球场嘅相片，影住双脚，并特别注明地点系曼彻斯特，似乎有意令人联想佢可能打算重投曼联。迪基亚今次重返故地，唔止打网球咁简单，原来专程去睇女子欧联第2圈外围赛，曼联女足主场对巴黎圣日耳门女足，最终打和1比1，至於迪基亚有冇同曼联旧队友，甚至领队坦哈格见面，就不得而知。
        不过，迪基亚喺「敏感时间」现身曼彻斯特，就引来唔少猜测，因为佢嘅「接班人」奥拿拿今季表现惨不忍睹，成为曼联成绩欠佳嘅罪人，要求将佢贬为後备嘅声音此起彼落。迪基亚属於自由身球员，可以随时同任何球队签约，佢获得上季英超代表最佳门将嘅「金手套奖」，难怪唔少网民同球迷都希望迪基亚重投曼联，打救红魔鬼。