消失的他！拉维亚首演推迟到12月

xcy232323

       

        车路士今个夏天大事扩军，包括用5,800万镑(约5.8亿港元)签入比利时中场罗美奥拉维亚，不过呢位19岁新星加盟後仲未落场，已经喺操练期间受伤，据报佢嘅足踝伤势仍然严重，预计要到12月先有机会为车路士首演，唔少球迷都话已经唔记得呢个球员嘅存在。
        罗美奥拉维亚身价高昂，不过佢紧随摩西斯卡些度加盟，风头已被抢走，而且加盟後即喺操练受伤，到依家连热身赛都未踢过1场，自然被球迷遗忘。英国《每日邮报》报道，拉维亚右脚足踝韧带受创，上星期先至移除保护靴，最早要11月底先可以复操，希望12月可以正式落场。
        车路士领队普捷天奴证实：「我讲唔到畀你听拉维亚几时复出，佢依家仍然未可以跑步，所以今个国际赛期後都唔会复出。」车路士下场赛事，将系周日(22日)凌晨英超主场对阿仙奴。