龙兄虎弟！比宁咸细佬Good骚打动皇马

xcy232323

       

        英格兰新星祖迪比宁咸今季大爆发，正所谓龙兄虎弟，佢细佬祖比比宁咸亦锋芒初露，呢位18岁中场日前代表英格兰U19出赛表现出色，据报令现场观战嘅皇家马德里球探非常赏识，唔排除会签埋佢，两兄弟喺西甲拍住上！
        祖比比宁咸同阿哥一样踢攻击中场，而且今夏亦喺祖迪比宁咸加盟皇马当日，由伯明翰转投新特兰。祖比比宁咸今个国际赛期代表英格兰U19上阵，皇马亦派出球探睇佢上星期对黑山U19嘅赛事，虽然最终踢成0比0，但着10号波衫嘅祖比比宁咸喺比赛中制造唔少机会，大步推进同交波都好有哥哥影子。
        据西班牙《国家报》报道，皇马首席球探卡拉法特对祖比比宁咸嘅演出非常欣赏，呢位西甲班霸亦打算出手抢人。祖比比宁咸依家系新特兰主力，今季11场英冠联赛全部正选上阵，有2个入波同1次助攻。