曼联2比1险胜锡菲联 马古尼延续神奇胜率

xcy232323

       


        周日(22日)凌晨英超大战，曼联作客2比1险胜锡菲联，今季联赛首次2连胜。曼联今场防线继续残阵，临危受命嘅中坚哈利马古尼大踢争气波，赛後获选为全场最佳球员更眼泛泪光，延续过去1年为「红魔鬼」正选上阵超过9成嘅神奇胜率，曼联真系要再谂谂系咪非卖呢位「福将」不可。
        曼联赛前收到传奇名宿卜比查尔顿去世嘅噩耗，今场亦有哀悼仪式，上仗梅开二度嘅麦汤米尼，今仗28分钟禁区内起脚再次得手，但佢6分钟後喺禁区内犯手球，锡菲联由奥利华麦贝尼操刀追平。曼联之後曾经中楣同中柱，以为今场冇运行，达洛治77分钟离门25码轰入世界波，终为曼联赢2比1。
        曼联今场表现唔算好，今季只拎过1分排包尾嘅锡菲联都有12次攻门，好在哈利马古尼发挥出色，今场触球次数(104次)、拦截成功率(100%)、成功传球(76次)、成功争顶(5次)都系全场最高，赛後访问获颁MOTM(全场最佳)奖座更眼湿湿，大有苦尽甘来嘅味道。
        统计显示过去12个月，哈利马古尼为曼联正选上阵16场，球队有15胜1负嘅神奇战绩，胜率接近94%。曼联领队坦哈格赛後大赞：「马古尼踢出我哋想见到嘅表现，非常主动、控制对手、阅读球赛、积极控球、交直线同埋转边，我都戥佢开心。」
        夏天几乎被曼联卖走，早前亦威胁可能1月走人嘅哈利马古尼，赛後向卜比查尔顿感人致敬：「我哋备战嗰阵听到呢个噩耗，大家受到好大打击，佢赛後经常嚟到更衣室照亮我哋，大家都感受到佢嘅影响力，佢系曼联真正传奇。今场赢波当然开心，但有啲事情系凌驾於足球，我哋会想念佢、全世界都会想念佢。」