车路士陈年交易涉违规 随时要扣分

xcy232323

       

        车路士班主保利入主後，查数发现球会帐目混乱，今年中主动向英格兰足总、欧洲足协等申报。据英国《泰晤士报》报道，足总正调查车路士喺2013年收购韦利安同伊度奥嘅转会，车路士曾向神秘「第3方」支付，怀疑涉及违规操作，有可能会被罚扣分。
        报道指车路士喺10年前，用3,000万镑向俄罗斯球会安治收购巴西翼锋韦利安，1日後再用200万镑签埋安治前锋伊度奥，当时车路士班主仲系俄罗斯油王阿布拉莫域。不过保利接手後，发现当中有部份转会费以外嘅款项去咗俄罗斯嘅神秘第3方，而且未有收录喺官方帐目，英格兰足总已展开调查。
        早前英国传媒亦曾踢爆，车路士喺签入丹麦中坚安达斯基斯坦臣嗰阵，涉嫌非法向佢爸爸支付巨款。车路士亦发出声明，表示涉案嘅人都系昔日管理层，依家嘅职员未有涉案，但英国《太阳报》指出，如果证实车路士有违规行为，可能会被罚扣分。