0射门+送12码 海伦同夏兰特比较系笑话

xcy232323

       


        曾经被捧为「新夏兰特」嘅曼联前锋海伦上仗英超「曼市打吡」，遇上「正版夏兰特」，结果高下立见，艾宁夏兰特梅开二度及贡献1次助攻，协助曼城大胜3比0。反观，海伦唔止冇波入，竟然连1次射门都冇，呢位丹麦国脚今季联赛上阵7次，仍然0入球0助攻，沦为英超「007」，睇怕曼联又买咗「水货」。
        当全世界以为两位当红北欧射手交锋，将大斗射术嘅时候，点知形势一面倒，海伦冇起脚机会之余，更於26分钟喺禁区内拉跌对手洛迪卡斯简迪，造就艾宁夏兰特射入12码，实在讽刺。
        海伦全场最有威胁1次埋门系31分钟，获得单刀机会，但被对手力逼之下，起唔到脚，只能回传畀般奴费南迪斯，点知呢位队长一脚射高。最终海伦踢咗73分钟就被换走，录得0入波0助攻0射门嘅「三零」尴尬纪录，兼送12码畀曼城。
        20岁嘅海伦今夏以7,200万镑(约6.8亿港元)转会费由阿特兰大加盟曼联，比曼城上年买夏兰特贵2,000万镑，但2人表现却有天壤之别，即使海伦今届欧联入3球，但英超仲未开斋，实在讲唔过去。C朗离队後，曼联一直希望有1位射手支撑锋线，但海伦明显发挥唔到呢个角色。