武磊首任中国队长 挑战历史射手王宝座

xcy232323

       

        中国即将展开冲击世盃之旅，早前带领上海海港重夺中超冠军嘅星级前锋武磊，亦被任命为国家队新队长，对泰国一仗会系佢首次以队长身份领军出战。今仗对对武磊意义重大，如果佢有入波，就可以超越名将柳海光纪录，独占中国队历史射手王宝座。
        曾经效力爱斯宾奴4年嘅武磊，重返中超後表现大勇，啱啱完结嘅中超球季有18球拎到「银靴奖」，佢喺煞科战梅开二度後，更累积131个中超入波，追平艾克森并列中超历史射手王。今次世盃外，武磊将挑战另一历史纪录，佢目前同80年代名将柳海光，以31球并列中国国家队史上入波最多球员嘅官方纪录，只要再入1球就可以独霸纪录！
        对於首次以队长身份带领中国队出赛，31岁嘅武磊喺对泰国前表示：「第1次做中国队长，多谢教练同队友信任，呢个臂章令我嘅责任更重。国家队正经历新旧交接，有好多年轻球员加入，我作为老将亦要成为榜样，无论系球场上嘅技战术，或者日常生活嘅管理，我都要承担更多责任。」