巴塞为悭钱 打算放走罗拔佬

xcy232323

       

        西甲劲旅巴塞隆拿近年陷入财困，西班牙传媒最新消息指会方为咗节省开支，打算明夏放走射手罗拔利云度夫斯基，从而悭到5,800万欧元(约4.9亿港元)巨额薪酬支出，呢位35岁波兰国脚可能去沙特阿拉伯掘金。
        罗拔利云度夫斯基上季为巴塞上阵46场入33球，今季上阵16场入8球及4次助攻，但近9场仅入2球，西班牙《阿斯报》指佢似乎遭到队友孤立，射门机会愈来愈少。罗拔利云度夫斯基将於2026年夏天约满，佢未来2季总薪酬高达5,800万欧元，会方担心佢状态持续走下坡，考虑到成本效益，出售高峰已过嘅「罗拔佬」，比较符合球会利益。
        事实上，巴塞已经搵到「罗拔佬」接班人，巴西18岁新星洛基费拉拿将於下月加盟，加上会方有意明夏买断祖奥菲历斯、祖奥简斯路，需要资金周转，出售罗拔利云度夫斯基系一个唔错选择。
        如果巴塞明夏卖唔出「罗拔佬」，只要佢下季上阵时间唔够55%，会方都可以喺2025年夏天同佢提早1年解约。
        沙特阿拉伯豪门希拉尔今夏曾经邀请罗拔利云度夫斯基加盟，但被佢婉拒，佢现时情况有变，可能会改变主意。