车路士大起大落 曼联主W好路

xcy232323

       


        英超快车重头大战，曼联主场迎战车路士，两支褪色劲旅开季演出备受批评，不过曼联近期有复苏迹象，近7场联赛拎到5胜，同前列分子差距唔算太大。车路士成绩大起大落，防守问题迟迟未解决，曼联喺奥脱福出击可望「煞车」，不妨直取主胜。（Now 621及611周四凌晨4时15分直播）
        曼联上场作客输畀纽卡素，联赛3连胜後首次输波，佢哋捱完3场作客之旅後，今仗返主场出战相信表现会有改善。随住劳基梳尔、云比沙卡等伤兵复出，青训新星阿历真度加拿祖、马恩奥等崭露头角，「红魔鬼」兵源调动能力大大提升，系球队表现回稳主因。
        红魔踢联赛好过欧联
        事实上曼联喺英超防守唔差，近4场联赛只失过1球，哈利马古尼复苏成为防线核心，踢欧联经常「出事」嘅门将奥拿拿，返到英超演出亦算稳定，防守稳健成为曼联反弹嘅最大动力。
        车路士以年轻球员为主，表现飘忽大起大落，对曼城激战踢成4比4後，对纽卡素又惨败1比4，上场对白礼顿再赢3比2，3场失10球嘅豆腐防线未能予人信心，加上干拿加历查今仗停赛，中场扫荡力再减弱。
        值得一提嘅系，今夏以5,200万镑（约5.1亿港元）转会费上「车」嘅尼干古，喺季前受伤後一直缺阵，直到近日呢位法国中场先伤愈复操。原本佢仲有机会踢上场英超对白礼顿，但领队普捷天奴为安全起见，畀佢准备多几日，预料今场有机会候命上阵。
        不过，尼干古攻强於守，即使披甲对车路士防守亦冇乜帮助，加上佢哋向来不擅应付快速反击，今仗面对「红魔鬼」高速锋线未必招架得住。车路士对上一次喺英超作客赢曼联，已经系10年前旧事，今仗难以睇好。