西维尔垫底 冇得「衞冕」欧霸盃

xcy232323

       

        周三(13日)凌晨欧联B组，西维尔作客以1比2不敌朗斯，今届分组赛6战不胜，排小组包尾出局，冇得转战有「西维尔盃」之称嘅欧霸盃，网民都认为系好事，因为唔使又睇西维尔捧欧霸盃咁闷。
        赛前两队都已经无法出线欧联16强，今场属於第3位欧霸盃参赛资格之争，法甲球队朗斯63分钟由法兰高斯基射入12码打开纪录。16分钟之後，西维尔亦获得12码，中坚沙治奥拉莫斯主射入网，呢位37岁老将喺欧联累积入17球，超越碧基、卡路士，成为1992/93年球季欧联改制後入波最多嘅後衞。战至补时6分钟，後备上阵嘅朗斯中场安祖路富坚尼建功，以2比1绝杀西维尔，将转战欧霸盃。
        西维尔曾经7次捧欧霸盃冠军，包括上届夺冠，属於呢项赛事史上捧盃次数最多嘅球队，但随住欧联包尾出局，冇得去衞冕欧霸盃，网民认为可以令呢项赛事有番「新鲜感」。西维尔现时排西甲16位，受到降班威胁，好可能下届欧洲赛都见唔到佢哋身影。
        至於同组另一场例行公事，肯定以首名出线嘅阿仙奴以副选出击，并由尼基迪亚入波打开纪录，但作客被燕豪芬逼和1比1。