曼联顶住利物浦34次攻门 0比0闷和当赢波！

xcy232323

       


        周一(18日)凌晨英超「双红会」，球迷赛前预期嘅「大屠杀」未有出现，利物浦主场录得34次埋门下，被曼联用血肉长城一一顶住，最终踢成0比0完场。利物浦队长华基尔云迪积克赛後批评曼联战术「唔想赢」，而曼联领队坦哈格就大赞球员踢出纪律，对1分非常满意。
        上季利物浦喺晏菲路球场7比0狂数曼联，考虑到两军近期表现同走势，唔少人担心曼联会再次惨败。利物浦一如所料占尽上风，发动一浪接一浪攻势，16分钟奥拿拿门前接波甩手几乎被穆罕默德沙拿执鸡，但佢之後救出华基尔云迪积克头槌劲顶，上半场踢成平手。
        换边後利物浦加强进攻，但面对曼联重兵死守未能制造有质素嘅攻门，「红魔鬼」众志成城下，包括奥拿拿有8次扑救、华拉尼有15次解围，就算达洛治喺补时阶段因投诉过激连拎2黄牌被逐，曼联最终保住0比0抢走1分，而利物浦失分後跌落第2位，落後榜首阿仙奴1分。
        根据Opta数据，利物浦今场录得34次攻门，比上季赢7比0一仗更夸张，亦系自2016年10月以来英超单场最多攻门而0入球球队，「红军」队长华基尔云迪积克赛後表示：「今场有1支球队尝试赢波，可惜未能成功，我哋喺每一方面都系优胜嗰队，曼联拎到1分已经欢天喜地。」
        对於华基尔云迪积克嘅讽刺，坦哈格就唔回应：「呢啲系佢嘅意见。我对曼联表现好满意，所有球员都做足部署，团结一致咁去战斗，或者唯一值得批评嘅，系控球嗰阵可以做好啲。利物浦嘅进攻好犀利，只有非常有纪律嘅防守先可以阻止佢哋入波，呢个系对曼联球员一大嘉许。」