谢德谦：红魔今晚自求多福

xcy232323

       


        英超两支传统死敌今周碰头，利物浦主场迎战曼联！早两日同一位支持咗曼联廿几年嘅英国球迷倾计，点睇呢场双红会？佢轻描淡写讲咗句「God bless」。
        我绝对明白佢嘅心态，上周输俾般尼茅夫3球，加埋周中欧联以小组最低分出局後，老实讲对住榜首嘅利物浦抱住输少当赢嘅心态去对待就够啦，无期望就无失望，到时曼联可能有惊喜畀到大家，就好似对住车路士咁。
        点解睇曼联睇得咁淡，除咗近况飘忽外，仲要前中後三线都有唔同球员受伤，望住张受伤名单都戥坦哈格担心，排阵相当头痛。仲要巧合地，系坦哈格之前几位曼联领队当中包括莫耶斯、苏斯克查同摩连奴等等，都系对完利物浦输波之後无耐就执包袱走人，呢次我都要同坦哈格讲句「God bless」。
        利物浦虽然欧霸输波，但因为已经锁定首名出线，对士气打击应该不大，佢哋亦事先张扬呢场比赛将会作出轮换，当中华基尔云迪积克、穆罕默德沙拿同阿历山大阿诺特等等主力可以留守基地唔洗舟车劳顿。曼联就完全相反，周中面对拜仁希望争取一丝出线希望，可惜输波而回，今次真系「赔了夫人又折兵」，喺曼联系种种不利因素下，利物浦呢三分都袋咁一半。