谢德谦：利阿「6分波」有好戏睇

xcy232323

       

        英超快车赛程紧密，喺圣诞前夕上演重量级榜首大战，利物浦主场迎击阿仙奴，今场系关系到争标形势嘅「6分波」，尤其双方喺进攻方面都有隐忧，即使多波入，但胜负都只会喺一、两球之间，战况肯定激烈。
        利物浦於周中英联盃大胜韦斯咸5比1轻松晋级，对士气有一定帮助。「红军」今季主场优势强劲，在晏菲路球场7胜1和未曾失手，今场面对宿敌阿仙奴相信都可以睇高少少。
        然而，主帅高普仍有唔少问题要解决，首先最大影响系中场核心阿历斯麦亚里士打受伤，对球队发挥影响唔少，日籍中场远藤航仍然适应英超节奏当中，相信赖恩格云贝治及居迪斯锺斯会有机会担正。
        另外，近期进攻火力明显下降，最大原因系达云纽尼斯近11场都食白果，呢个心理压力对一个前锋影响都几大，睇吓高普有冇计可以帮佢增强信心。
        阿仙奴上场沉着应战下以2比0击败白礼顿，成场波发挥明显占优，加比尔捷西斯把握对手犯错先开纪录，以及夏维斯完场前入球埋斋。主帅阿迪达面对唔少伤兵问题，最主要有翼锋加比尔马天尼利，呢位巴西兵对球队边路突破甚为重要，而且今季兵工厂欠缺一名可倚靠嘅射手，联赛首席射手只有布卡约沙卡及尼基迪亚各入5球，可见进攻火力难有保证。
        值得一提嘅系，「兵工厂」近期作客成绩认真麻麻，作客卢顿都系以4比3险胜，今场面对强敌利记，相信能攞1分都心满意足。