新老板效应？曼联1月转会计划曝光

xcy232323

       

        曼联日前宣布拉特克利夫正式入股，同时掌管球会足球业务，被视为「红魔鬼」拨乱反正嘅第1步。不过着名记者爆料，拉特克利夫嘅「新老板效应」唔会即时显现，1月转会窗操作会「一切照旧」，意味唔会有星级新兵加入，只能够好似上季咁借人填数。
        拉特克利夫改革曼联决心极大，但系完成收购25%股份手续後，仲要6至8个星期时间等英超进行「新老板审核」程序，最快要到2月先正式进驻董事局，即系1月仍会沿用「格拉沙式」嘅运作模式，早前传闻嘅久保建英、施斯高、艾云费格逊等贵价球星多数冇行。
        据《ESPN》记者奥登透露：「曼联球迷应该兴奋，因为格拉沙家族终於退入幕後，不过庆祝要停一停，因为拉特克利夫最快要2月先会上任，1月转会窗唔关佢事，冬季仍然会系格拉沙式操作，即系唔会有太多事发生，可能会有几个球员离队，再借用几个球员，唔会有乜惊喜。」
        曼联将保留弹药喺夏天再次重建，上季嘅1月转会窗，曼联就借用咗沙比萨、韦格贺斯同毕兰特3名球员，全部都喺借用期完结後未获留用。