车路士2大前锋停赛 焗住靠败家之王

xcy232323

       


        车路士喺平安夜(24日)作客1比2输畀狼队，最大败因系一条锋线齐齐「败家」，史达宁、尼高拉斯积逊同布查分别错失机会，其中尼高拉斯积逊2次单刀都搞到一镬粥，被换走嗰阵竟引嚟车迷欢呼。最惨嘅系，史达宁同高尔彭马下场停赛，好可能要继续靠尼高拉斯积逊孭飞。
        车仔今场屡误戎机，史达宁上半场1次3打1快攻「独食」射失当然抵打，不过尼高拉斯积逊亦不遑多让，上半场一次禁区内空晒面对龙门，竟然连控波都控唔到；下半场一次单刀由滚水渌脚，连起脚都做唔到就被对手解围，冇耐仲拎到今季个人第8面黄牌，成为英超今季「牌王」。
        Opta数据显示，车路士今季有36次错失「黄金机会」，败家程度系英超之冠，而车仔前线表现最稳定嘅史达宁同高尔彭马，今场分别累积第5面黄牌，要喺周四(28日)凌晨对水晶宫停赛。车路士领队普捷天奴，赛後选择力撑尼高拉斯积逊：「其实睇番同龄(22岁)前锋，积逊喺英超入波唔少，要闹就全队一齐闹，要改善把握力，只有不断咁练习。」