捧世冠盃即翻生 曼城反胜爱华顿重返前4

xcy232323

       

        周四(28日)凌晨英超赛事，上星期捧走世冠盃冠军嘅曼城，作客3比1反胜爱华顿，喺积分榜重返前4位置。曼城今仗入局较慢，上半场更落後0比1，领队哥迪奥拿喺休息期间用球员波衫上嘅「世界冠军金章」作激励，果然令曼城翻生，再一次上演绝地反击好戏。
        喺艾宁夏兰特仍然缺阵下，面对近况大勇嘅爱华顿，曼城上半场陷入苦战，29分钟洛迪卡斯简迪禁区内交失，杜韦麦尼尔截到後底线传中畀积夏里逊射入。爱华顿领先後，用招牌嘅死球同长传令曼城防线出现唔少险象，半场爱华顿领先1比0。
        换边後曼城开着Turbo，53分钟菲尔科顿离门廿几码轰入世界波追和。曼城之後攻势浪接浪，62分钟爱华顿球员禁区内用手闩波被罚12码，祖利安艾华利斯操刀射成2比1。爱华顿尾段想再谷，但86分钟门将比克福特禁区外解围被闩，贝拿度施华第1时间笠入空门，最终曼城反胜3比1。
        曼城今场首次着住印上世界冠军金章嘅波衫出赛，菲尔科顿赛後表示：「我哋上半场踢得唔差，但就好似之前比赛一样(赢唔到)，大家都系气馁，不过哥迪奥拿喺半场不断激励我哋，指住我哋心口个金章话，呢个世界冠军唔系天跌落嚟，一定要相信自己系顶级。」
        哥迪奥拿对於自己嘅激励收到效用表示高兴：「今仗展示出我咃系世界冠军嘅原因，我依家开始要每日提住球员我哋系世界冠军，有责任去保持呢个水平。」曼城今季罕见成日踢逆境波，今场系佢哋喺落後情况下拎到嘅第11分，已经超过上季全季数字(10分)。