圣诞冠军变新年阿4 阿仙奴2连败爆内讧

xcy232323

       

        2023年英超压轴大战，阿仙奴周日晚(31日)作客1比2不敌富咸，忽然崩溃陷入2连败。上星期阿仙奴仲系英超「圣诞冠军」，3日内连输2场後惨变「新年阿4」，只系比第5位嘅热刺多1分，而且迪格兰赖斯等球员更疑似喺球场上出现内讧，隐忧重重。
        阿仙奴上仗主场吞韦斯咸2蛋，今仗作客富咸本来有个好开始，布卡约沙卡5分钟门前执鸡先开纪录，不过领先後踢到患得患失，富咸29分钟快速反击，鲁尔占美尼斯接应左路传中射入。3日2战嘅阿仙奴下半场体力不继，富咸59分钟角球混战，卜比列特近门射成2比1，送阿仙奴2连败。
        阿仙奴输波之余仲疑似爆内讧，迪格兰赖斯比赛期间同加比尔马加希斯激烈争执，至於被换走嘅加比尔马天尼利，亦被影到返後备席後，无视伊美路维伸手，拒绝同对方握手。迪格兰赖斯赛後不满表示：「近2仗表现完全唔符合我哋定出嘅水平，我哋令自己失望、令球迷失望。」
        阿仙奴领队阿迪达亦承认今仗系「全季最差」一战：「上场(对韦斯咸)我哋输咗一场我哋应该赢嘅比赛，但今仗完全唔同，我哋嘅表现完全唔值得赢波。唔需要藉口，今场系我哋全季最差嘅一仗，未来几日会好痛苦，但都要尽快重新振作。」