谢德谦：伦敦打吡精彩迎新年

xcy232323

       


        富咸喺除夕夜英超迎战阿仙奴，两队上场都输波而回，虽然双方积分相差甚多，但伦敦打吡往住激发大家斗志，加上想用胜利迎接新嘅一年，相信会系一场精彩嘅比赛。
        富咸近况认真麻麻已经三连败，上场系拆礼物日大败般尼茅夫0比3，全队表现处於下风，当中门将宾特尼奴表现患得患失，第一个失波更系佢判断失误导致球队落後。尼奴喺比赛途中更冲往底线向球僮要波，赶住开龙门球，佢接波後一手将球僮推开，惹来主场球迷不满，虽然球证没有出示黄牌，但有机会秋後算帐。场外场内嘅事件，相信会对尼奴有所影响，睇下主帅马高施华点样拆弹。
        阿仙奴上轮於主场以0比2不敌韦斯咸，全场控球高达七成兼多达三十次射门，竟然颗粒无收。阿仙奴第一个失波，系对手喺底线有出界之嫌下传中先开纪录，最终导致失落榜首席位。阿仙奴相隔2个月，竟然再次发生同类事件而输波，相信主帅阿迪达都只能大叹一句无奈。阿仙奴休息时间虽然比富咸少，但以佢哋嘅实力，加上近六次交手未尝一败，估计今场力战之下可以小胜而回，用赢波迎接新一年。