【有片】格连活特闹球证被逐 基达菲输波

xcy232323

       


        周三(3日)凌晨西甲赛事，基达菲主场有3人被逐情况下，以0比2不敌华历简奴，食红牌嘅球员包括曼联借将格连活特。呢位英格兰前锋下半场因爆粗闹球证被逐，不过基达菲教练指格连活特并冇侮辱任何人，批评球证反应过激。
        基达菲开局唔顺，40分钟就有前锋拉达沙2黄1红被逐，更喺补时阶段失守落後。换边後2分钟华历简奴再下一城，基达菲随即反扑，格连活特中场连过数人，最後被对手包夹截停，格连活特就转身向球证举出4只手指，示意被侵犯咗4次，而且口中念念有词，结果球证出示红牌将佢赶走。基达菲70分钟再有啱啱被换出嘅达米安苏亚雷斯被逐，最终输0比2完场。
        基达菲教练保迪拿斯赛後表示：「格连活特话佢只系讲『系咪玩X我，咁都唔吹？』佢只系表达自己嘅不满，并冇侮辱任何人，只系一句普通嘅评论。」格连活特今季喺西甲表现出色，15场联赛交出3个入波同4次助攻。